រដ្ឋបាលស្រុកឈូក រៀបចំពិធីទិវាជាតិនៃការចងចាំ ២០ ឧសភា ដើម្បីឧទ្ទិសកុសលដល់ជនរងគ្រោះក្នុងរបប ប៉ុល ពត

ខេត្តកំពត៖ ថ្ងៃសុក្រ ៦កើត ខែជេស្ឋ ឆ្នាំមមី អដ្ឋស័ក ព.ស ២៥៧០ ត្រូវនឹងថ្ងៃទី២២ ខែឧសភា ឆ្នាំ២០២៦ នេះ រដ្ឋបាលស្រុកឈូកបានរៀបចំពិធីគោរពវិញ្ញាណក្ខន្ធ ក្នុងឱកាស «ទិវាជាតិ នៃការចងចាំ ២០ ឧសភា» ដែលជាថ្ងៃប្រជាជនកម្ពុជាគ្រប់រូបមិនអាចបំភ្លេចបាន។

ពិធីនេះបានប្រព្រឹត្តទៅនៅបរិវេណវត្តបទុមប្រាំងស៊ីវឌ្ឍនារាម (ហៅវត្តស្ទឹង) ក្រោមអធិបតីភាពដ៏ខ្ពង់ខ្ពស់របស់ លោក សៅ មឿន អភិបាលនៃគណៈអភិបាលស្រុកឈូក។

គោលបំណងនៃការរៀបចំពិធី
ការប្រារព្ធពិធីនេះឡើង គឺធ្វើឡើងក្នុងគោលបំណងសំខាន់ៗ រួមមាន៖
រំលឹក និងលើកតម្កើងដួងវិញ្ញាណក្ខន្ធ៖ ដើម្បីឧទ្ទិសកុសលជូនដល់ដួងវិញ្ញាណក្ខន្ធរបស់ប្រជាពលរដ្ឋរងគ្រោះស្លូតត្រង់ជាច្រើនលាននាក់ ដែលបានបាត់បង់ជីវិតយ៉ាងអាណោចអាធ័ម និងអយុត្តិធម៌បំផុត នៅក្នុងរបបប្រល័យពូជសាសន៍ ប៉ុល ពត (ចាប់ពីថ្ងៃទី១៧ ខែមេសា ឆ្នាំ១៩៧៥ ដល់ថ្ងៃទី៦ ខែមករា ឆ្នាំ១៩៧៩)។

ការចងចាំប្រវត្តិសាស្ត្រ៖ ដើម្បីដាស់តឿនស្មារតីកូនខ្មែរជំនាន់ក្រោយឱ្យចងចាំនូវការឈឺចាប់ និងសោកនាដកម្មដែលមិនអាចបំភ្លេចបាន។

ការរួមគ្នាថែរក្សាសន្តិភាព៖ បង្ហាញពីតម្លៃដ៏មហាសាលនៃសន្តិភាពនាពេលបច្ចុប្បន្ន និងការប្តេជ្ញាចិត្តរួមគ្នាការពារមិនឱ្យរបបខ្មៅងងឹតបែបនេះកើតឡើងជាថ្មីនៅលើទឹកដីកម្ពុជាជាដាច់ខាត។

«២០ ឧសភា ជាថ្ងៃចងចាំមិនអាចបំភ្លេចបាន នូវស្រមោលអតីតកាលដ៏ជូរចត់ និងជាមេរៀនប្រវត្តិសាស្ត្រសម្រាប់ដាស់តឿនពលរដ្ឋគ្រប់រូបឱ្យរួមគ្នាថែរក្សាសន្តិភាព» ៕