ពិធីបើកការដ្ឋានសាងសង់ផ្លូវបេតុងជាអំណោយរបស់សម្ដេចធិបតី ហ៊ុន ម៉ាណែត ជូនប្រជាពលរដ្ឋខេត្តកែប

នៅព្រឹកថ្ងៃអង្គារ ទី២៨ តុលា ២០២៥ នេះ ខេត្តកែបបានប្រារព្ធពិធីបើកការដ្ឋានសាងសង់ផ្លូវបេតុងមួយខ្សែ ដើម្បីបម្រើផលប្រយោជន៍ដល់បងប្អូនប្រជាពលរដ្ឋក្នុងមូលដ្ឋាន។

សមិទ្ធផលនេះជាអំណោយដ៏ថ្លៃថ្លារបស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ជូនដល់ប្រជាពលរដ្ឋរស់នៅភូមិដំណាក់ចង្អើរ ខេត្តកែប។ ផ្លូវបេតុងថ្មីនេះនឹងជួយសម្រួលដល់ការធ្វើដំណើរ និងដឹកជញ្ជូនទំនិញកសិផលនានារបស់ប្រជាពលរដ្ឋឱ្យកាន់តែមានភាពងាយស្រួល និងរហ័សទាន់ចិត្ត ប្រកបដោយប្រសិទ្ធភាពខ្ពស់។

ពិធីបើកការដ្ឋានសាងសង់ផ្លូវបេតុងដែលមានទីតាំងស្ថិតនៅភូមិដំណាក់ចង្អើរ សង្កាត់ព្រៃធំ ក្រុងកែប ខេត្តកែប នេះ ត្រូវបានដឹកនាំជាអធិបតីដោយ៖ឯកឧត្តម សោម ពិសិដ្ឋ អភិបាលននៃគណៈអភិបាលខេត្តកែប ឯកឧត្តម អ៊ុក ថា ប្រធានក្រុមប្រឹក្សាខេត្ត។

វត្តមានរបស់ថ្នាក់ដឹកនាំខេត្តក្នុងពិធីនេះ បានឆ្លុះបញ្ចាំងពីការយកចិត្តទុកដាក់របស់រាជរដ្ឋាភិបាល និងអាជ្ញាធរដែនដី ក្នុងការកសាងហេដ្ឋារចនាសម្ព័ន្ធរូបវន្ត ដើម្បីលើកកម្ពស់ជីវភាពរស់នៅរបស់ប្រជាពលរដ្ឋនៅតាមមូលដ្ឋានជនបទ និងជំរុញការអភិវឌ្ឍខេត្តកែបទាំងមូល ៕