ឯកឧត្តមបណ្ឌិត សោម ពិសិដ្ឋ ចុះជំរុញការដ្ឋានស្តារប្រឡាយជុំវិញផ្សារដំណាក់ចង្អើរ ដើម្បីបង្ការជំនន់ទឹកភ្លៀងក្នុងរដូវវស្សា

ខេត្តកែប៖ ដោយមានការយកចិត្តទុកដាក់ខ្ពស់លើសុខទុក្ខ និងជីវភាពរស់នៅរបស់ប្រជាពលរដ្ឋ ពីសំណាក់អាជ្ញាធរខេត្ត នៅព្រឹកថ្ងៃទី២១ ខែកក្កដា ឆ្នាំ២០២៦ នេះ ឯកឧត្តមបណ្ឌិត សោម ពិសិដ្ឋ អភិបាលនៃគណៈអភិបាលខេត្តកែប បានអញ្ជើញចុះពិនិត្យសកម្មភាពការដ្ឋានស្តារប្រឡាយរំដោះទឹកមួយកន្លែង ដែលស្ថិតនៅទីតាំងជុំវិញផ្សារដំណាក់ចង្អើរ ក្រុងកែប ខេត្តកែប។

ការត្រៀមលក្ខណៈមុនរដូវវស្សាមកដល់
សកម្មភាពចុះពិនិត្យដោយផ្ទាល់ពីសំណាក់ថ្នាក់ដឹកនាំខេត្តនាពេលនេះ គឺធ្វើឡើងក្នុងគោលបំណងពន្លឿន និងធានាឱ្យបាននូវប្រសិទ្ធភាពនៃការរំដោះជំនន់ទឹកភ្លៀង។
នេះជាការត្រៀមលក្ខណៈបង្ការទុកជាមុនឱ្យទាន់ពេលវេលា មុនពេលដែលរដូវវស្សាធ្លាក់ស្រោចស្រពមកខ្លាំង ដែលអាចបង្កជាការលិចលង់ ប៉ះពាល់ដល់ការរស់នៅ ក៏ដូចជាការប្រកបអាជីវកម្មរបស់បងប្អូនអាជីវករ និងប្រជាពលរដ្ឋនៅក្នុងមូលដ្ឋាន។

ការណែនាំពង្រឹងគុណភាពបច្ចេកទេស
នាឱកាសនោះដែរ ឯកឧត្តមអភិបាលខេត្ត ក៏បានផ្តល់ការណែនាំយ៉ាងម៉ឺងម៉ាត់ដល់មន្ត្រីជំនាញ និងក្រុមការងារបច្ចេកទេស៖
ពង្រឹងគុណភាព៖ ត្រូវយកចិត្តទុកដាក់ខ្ពស់លើគុណភាពនៃការស្តារប្រឡាយទៅតាមស្តង់ដារបច្ចេកទេស។

ធានាចរន្តទឹក៖ ត្រូវធានាឱ្យមានចរន្តទឹកហូរបានលឿន និងល្អប្រសើរ មិនឱ្យមានការកកស្ទះដោយសារកាកសំណល់ផ្សេងៗ។

ឯកឧត្តមបណ្ឌិតបានសង្កត់ធ្ងន់ថា ការធ្វើបែបនេះគឺដើម្បីបម្រើផលប្រយោជន៍យូរអង្វែង ក្នុងការអភិវឌ្ឍ និងថែរក្សាសោភ័ណភាព ព្រមទាំងបរិស្ថានរបស់ក្រុងកែបទាំងមូលផងដែរ៕