លោក សៅ មឿន អភិបាលស្រុកឈូក ដឹកនាំសម្របសម្រួលដោះស្រាយវិវាទដីធ្លី និងបោះបង្គោលព្រំប្រឡាយបញ្ចប់ដោយជោគជ័យ

ខេត្តកំពត៖ នៅរសៀលថ្ងៃទី១៩ ខែមិថុនា ឆ្នាំ២០២៦ លោក សៅ មឿន អភិបាល នៃគណៈអភិបាលស្រុកឈូក បានដឹកនាំក្រុមការងារចុះសម្របសម្រួលដោះស្រាយ និងបោះបង្គោលព្រំប្រឡាយទឹកមួយកន្លែង ដែលស្ថិតនៅក្នុងភូមិព្រៃភ្ជុំ ឃុំបានៀវ ស្រុកឈូក ខេត្តកំពត។

គួររំលឹកផងដែរថា ករណីវិវាទមួយនេះ ត្រូវបានអាជ្ញាធរស្រុកធ្វើការសម្របសម្រួល និងចរចាចំនួន ៥ ដង រួចមកហើយ ទើបតែទទួលបានលទ្ធផលជាផ្លែផ្កានៅពេលនេះ។

ការចង្អុលបង្ហាញពីថ្នាក់ដឹកនាំខេត្ត
ការចុះដោះស្រាយផ្ទាល់នេះ គឺធ្វើឡើងក្រោមការចង្អុលបង្ហាញ និងបទបញ្ជាយ៉ាងម៉ឺងម៉ាត់ពីសំណាក់ ឯកឧត្តម ម៉ៅ ធនិន អភិបាល នៃគណៈអភិបាលខេត្តកំពត ដែលលោកតែងតែយកចិត្តទុកដាក់ និងជំរុញឱ្យអាជ្ញាធរមូលដ្ឋានដោះស្រាយរាល់ទុក្ខកង្វល់ ក៏ដូចជាវិវាទនានាជូនប្រជាពលរដ្ឋឱ្យបានទាន់ពេលវេលា។

លទ្ធផលនៃការសម្របសម្រួល
ក្រោមការដឹកនាំសម្របសម្រួលប្រកបដោយគតិបណ្ឌិត និងការយកចិត្តទុកដាក់ខ្ពស់ពីសំណាក់លោកអភិបាលស្រុកឈូក ជាលទ្ធផល៖
ការយល់ព្រមពីគ្រប់ភាគី៖ ភាគីវិវាទទាំងសងខាងបានយល់ព្រមតាមការដោះស្រាយ និងបានឯកភាពគ្នាបញ្ចប់វិវាទនេះជាស្ថាពរ (សះជា)។

ការបោះបង្គោលព្រំ៖ ក្រុមការងាររួមជាមួយប្រជាពលរដ្ឋ បានធ្វើការបោះបង្គោលកំណត់ព្រំប្រឡាយរួមគ្នា ដើម្បីចៀសវាងការទាស់ទែង និងទំនាស់ណាមួយកើតឡើងជាថ្មីទៅថ្ងៃមុខ។

ការដោះស្រាយផ្លូវធ្វើដំណើរ៖ ជាមួយគ្នានោះដែរ លោកអភិបាលស្រុកបានបញ្ជាក់ឱ្យដឹងថា មានប្រជាពលរដ្ឋចំនួន ១០ គ្រួសារ ទទួលបានការដោះស្រាយតាមការស្នើសុំ ដើម្បីបើកផ្លូវសម្រាប់ធ្វើដំណើរចេញ-ចូល ក្នុងការដឹកជញ្ជូនកសិផលផ្សេងៗ។

នេះជាជោគជ័យមួយទៀតរបស់អាជ្ញាធរស្រុកឈូក ក្នុងការអនុវត្តគោលនយោបាយដោះស្រាយវិវាទក្រៅប្រព័ន្ធតុលាការ នាំមកនូវភាពសុខសាន្ត និងការសាមគ្គីភាពនៅក្នុងសហគមន៍។