ឯកឧត្តម សាយ សំអាល់ កោតសរសើរអាជ្ញាធរខេត្តកែប ចំពោះការជួយសង្គ្រោះស្ត្រីសម្រាលកូនបន្ទាន់

ភ្នំពេញ៖ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះជួយខេត្តកែប បានបង្ហោះសារមួយកោតសរសើរ និងថ្លែងអំណរគុណយ៉ាងជ្រាលជ្រៅចំពោះ អាជ្ញាធរខេត្តកែប ដែលបានបង្ហាញនូវស្មារតីទទួលខុសត្រូវ និងមនុស្សធម៌ខ្ពស់ ក្នុងការជួយសង្គ្រោះ និងសម្របសម្រួលដល់ករណីស្ត្រីម្នាក់សម្រាលកូនភ្លាមៗ នៅតាមផ្លូវ ក្រោយធ្វើដំណើរឆ្លងទឹកពីកោះ។

យោងតាមខ្លឹមសារដែលឯកឧត្តមបានបង្ហោះ អាជ្ញាធរខេត្តកែប បានធ្វើអន្តរាគមន៍ទាន់ពេលវេលា ដើម្បីជួយសម្រួលដល់ដំណើរការសម្រាលកូនរបស់ស្ត្រីរូបនោះ ហើយបានដឹកជញ្ជូនទាំងម្តាយ និងទារកទៅកាន់ មន្ទីរពេទ្យ ដោយសុវត្ថិភាព ដើម្បីធានាបាននូវសុខភាពល្អទាំងពីរនាក់។

ឯកឧត្តម សាយ សំអាល់ បានសរសេរក្នុងសារនោះថា៖
“ខ្ញុំសូមអរគុណ និងកោតសរសើរ ចំពោះអាជ្ញាធរខេត្ត [កែប] ដែលបានសម្របសម្រួល ជូនបងស្រីដែលមកសម្រាលកូន។”

សកម្មភាពមនុស្សធម៌ និងការទទួលខុសត្រូវរបស់អាជ្ញាធរខេត្តកែបនេះ គឺជាការអនុវត្តជាក់ស្តែងស្របតាម #គោលនយោបាយភូមិឃុំសង្កាត់មានសុវត្ថិភាព របស់រាជរដ្ឋាភិបាល និងបង្ហាញពីប្រសិទ្ធភាពការងាររបស់ #ក្រុមការងាររាជរដ្ឋាភិបាលចុះជួយខេត្តកែប ក្នុងការយកចិត្តទុកដាក់ និងដោះស្រាយបញ្ហាបន្ទាន់របស់ប្រជាពលរដ្ឋ ជាពិសេសក្នុងស្ថានភាពដែលត្រូវការជំនួយសង្គ្រោះបន្ទាន់។